لما بتروح للدكتور يسالك بيقولك حاسس بايه
المرة دى يسالك نفس السؤال بس عاوز اجابة مختلفة
حاسس انك بتعبد ربنا بطريقة شكلية لسه مدخلتش فى علاقة حية معاه
لو انت دايما عاوز حقوقك وعمرك مافكرت فى واجباتك ولو دايما عاوز تاخد وعمرك مافكرت تدى
لو لسه متردد ومش عارف تاخد قرار قوى فى حياتك ولو انت لوحدك ومش عاوز تقرب لحد
حياتك من غير هدف،،خايف،،مكسوف ،،متردد،،مش واثق من نفسك
لسه مبقالكش شخصية مستقلة،،لسه ماشي مع الناس مكان مايروحوا بتروح وانت مش عارف رايح فين
لو انت كل ده او جزء منه دايما هاتحس انك مش مبسوط وفى حاجة نقصاك وفى مشكلة
طيب ماتفكر تتغلب على كل ده هو مستنيك
تعالى اليه وسلم ليه وحط حياتك بين ايديه عارف مين هو
ومين غير الهنا الطيب الحنون من غير ربي يسوع ينفع انك تروح له وتسكب نفسك بين ايديه
صدقنى محدش ينفع تلجا له غيره صدقنى هو بس اللى يقدر
النهاردة انا جاى اقولك حطم قيود السلبية هتقولى ازاى؟
قبل اى حاجة ينفع انك تعملها عايز اقولك انك لوحدك مش هاتقدر
لكن فى قوة جواك فى كنز جواك انت دافنه هو اللى ينفع انه يساعدك
جواك الروح القدس جواك عمل النعمة قف اطلب من ربنا وهو هيساعدك
بس انت لازم يكون جواك 3 حاجات
1- لازم من جواك تبقي عاوز تتغير ،،لازم يكون جواك ارادة حية انك تبدا رحلة التغيير
تكون ارادتك فى اتجاه واحد بس انك تمسك ايد الهك يعبر بيك لحياة جديدة
2- تبقي واثق،،تبقي متاكد انك وانت ماسك ايد الهك تقدر تنتصر،،تققدر تنجح
تقدر تحطم كل قيد سلبى فى حياتك
3- لازم تقعد مع نفسك وتصلى وتطلب ارشاد ربنا
تحدد سلبياتك وتبدا تتدرب ازاى تعالجها تدريجيا
4- تقرر تسلك خلال القنوات اللى عملتها الكنيسة لينا
(كتاب مقدس،،سر التوبة والاعتراف،،القداس،،التناول)
الكلام باين انه صعب لكن بقوة الروح القدس اللى اخدتها فى المعمودية صدقنى هتقدر
اخر حاجة عاوز اقولها لك هى ايه
هى الحاجات اللى لو لقيتها جواك تعرف انك شخص ايجابى
1- تبدا بعمل الخير
2- تكون ملتزم وتقدر تتحمل المسئوليه
3- تدور على الغلط جواك قبل ما تلوم حد تانى
4- تدرب نفسك انك تشارك الناس فى مشاكلهم وتساعدهم
5- يكون عندك انتماء لاسرتك ولوطنك ولكنيستك
6- تساعد الناس بروح المحبة
7- يكون عندك شخصية مستقلة ويكون عندك مبادئ
منقول
أ/مينا ناجح
عن مجلة هلبيس
كنيسة مارجرجس الجيوشي
