1-
أُم وحَاضنه ضَناها بحُرقه
وِبتِبكى مِن نار الفُرقَه
جَسمه مِتَلِّج جِتِّتُه زَرقه
وبينزِف ومفيش إسعاف
قبل ما يكتر ويزيد ألمه
كان فى الفَصل وماسِك قَلَمُه
فَجأة المَريَلَه شربِت دَمُّه
مات ولا حَد سِمع ولا شاف
مش فاهمين ... إحنا هناخُد إيه مـ الدُّنيا غير شِبرين
يِعجِب مين ... ليه فيه ناس مظلومه وناس تانيين ظالمين
****
دُنيا ومين هَيخَلِّد فيها
طَب ليه نِقتِل بَعض عَليها
حَتَّى كَفَنَّا مالوهشى جيوب
ياللى لا تِنعَس ولا بِتنام
ده العُمر إللى مافُُوهشى سلام
عُمر وضايع مش مَحسُوب
يا مولانا إسمَع لِدُعانا .. فيه جُوَّانا سَواد وذنوب
يا سَيِّدنا ساعِدنا إسنِدنا .. وإنجِدنا وكفايه حروب
2-
والأم دى ماتِت مِن جُوعها
جَف لَبَنها إديت له دموعها
لكن ماتت حاضنه رَضيعها
ماتت حاسَّه بنار ومرار
طِفل بيُصرُخ ويقول آه
وأبوه بيصَرَّخ ويَّاه
أصل منين هيجيب لُه دواه
وعلى الدَّوا والأكل حصار
حَد يحوش ... حَد يحِن دى ناس بتإن وشَعب حَزين
إحنا وحوش ...وللا بنِنسى إن إحنا أساساً بنى آدمين
3-
أصوات إنفِجارات ومَدافِع
ناس بِتهاجِم ناس بِتدافِع
أنا مش عارِف إيه الدَّافِع
إيه بيخَلِّى الدَّم يسيل
أو ليه تِبدَأ بالعِدوان
لو إنسان طََََََب ما أنا إنسان
أنا من حقى أعيش فى أمان
من غير خوف ودموع وعويل
سيبنى أعيش ... ماتقَرَّبش لبَلَدى وبيتى ماتِرهِبنيش
سيبنى أعيش ... عايز أنام بالليل فى أمان ما تهَدِّدنيش
4-
مين هَيوَقَّف ضَرب النَّار
حَرب ودايره ليل ونهار
وبيوت تتهد وتِنهار
وجَناين تِصبَح خَرابات
صَواريخ وقنابل ورصاص
ناس مِن ناس تانيه بتِنداس
إيد مَرمِيَّه وجَمبَها راس
وجَسَد بَقَى أجزاء وفُتات
ذنبهم إيه ... ناس أبريا بتموت أنا باأسأل غِلطوا فـ إيه؟
كل ده ليه ... ... ناس بِتموت وِمَنِلقاش قَبر نشيلهم فيه
5-
ليه بَقَى فيه أسلِحه نَوَوِيَّه
صِراعات وَحشِيَّه ودَمَوِيَّه
ومَفيش فى الكوره الأرضيه
حِتَّه مَفيش جُوَّاها خصام
إرحَمنا يارب إرحَمنا
هات من تانى يارَب سَلامنا
داوى جراحنا وإشفى آلامنا
إحنا فـ مِحنه كَما الايتام
فين يا ضمير .. فين يا ضمير العالَم صُوتَك ساكِت ليه
حِمل كبير ... فوق ضَهرنا شايلينُه ودايماً ماشيين بيه
6-
يا إلهنا عَشان إنتَ معانا
وإيديك ساندانا وشايلانا
عَلَشان واخِد بالَك مِننا
وسط العنف سلام يملانا
لينا فـ قَلب العالَم ضيق
ومفيش حاجه تبِل الرِّيق
بس العالَم إنتَ غلبتُه
يَعنى هَتُفرَج لَمَّا تضيق
وقت الخُوف ... مش بنخاف . جُوَّانا إيمان مِدِّينا أمان
مهما نشُوف ... مهما نقابِل عَتمه هيجى النُّور ويبان
7-
يارب إحنا كتير دَمَّعنا
وحزِننا وكِترِت أوجاعنا
على الحُب يا رَحمَن جَمَّعنا
خَضَّر تانى الأرض البُور
نَشِّف دَمعِتنا على خُدودنا
دافِع عَنَّا وإحمى حُدودنا
خَلِّى سَلامَك إنتَ يسُودنا
مَشِّى الضَّلمه وإبعَت نُور
مِد إيديك ... مالناش غيرَك وَقت الضِّيقَه بنِهرَب ليك
مِد إيديك ... إحنا تِعِبنا وجينا وسيبنا حمولنا عليك
كلمات الشاعر رمزى بشاره
ألحان وتوزيع م جورج رمزى
