الرجل الفيل بجد قصه غريبه اوى

الرجل الفيل بجد قصه غريبه اوى Skull_h_zoom

أتصاب بمرض غريب ساب اثار رهيبة وعجيبة فى جسمه وناس كتير قالت أن ”جون ميريك“ هو واحد من أقبح وأبشع المخلوقات. وأتعذب كتير من تشوهات خَلقية من ساعة ما اتولد خلت شكله يشبه الفيل وخلت الناس مش قادرين يصدقوا انه بنى آدم
وطلعت إشاعات وقالت أنه مش إنسان. ولكن المسكين صدق الكلام ده وفضل طول عمره مقتنع أنه نص إنسان ونص فيل وفضل يعانى من العذاب ده والسخرية والتريقة 27 سنة وهى دى سنين حياته، وده برغم أنه إنسان بمعنى الكلمة وحساس جداً وغاية في الثقافة والرقي و كان يُجيد القراءة والكتابة في وقت كان أغلب سكان بريطانيا جهلة، والمعاناة دى كانت بسبب أن الناس مش بتبص للجوهر ولكن بتبص للمظهر.
أتخلى عنه كل الناس حتى أهله وكل الناس رفضوه واعتبروه وَحْش وكل الناس رفضوا حتى أنهم يقربوله فأضطر أنه يشتغل فى سيرك علشان يقدر يلقى مكان يبات فيه وياكل ويشرب. وأبتدا يتعرض على الناس كأنه أى حيوان من حيوانات السيرك والناس تضحك على شكله وهو بيبكى من جواه من ألم الإهانات وكانت الناس بتيجى من أماكن بعيده عشان تتفرج عليه ويستهزئوا بيه، وكانت الأمهات بتجيب أطفاهم عشان يخوفوهم بيه لو كانوا أشقيا، وكان فيه شباب بيرموا الطماطم البايظه والحجارة على وشه، وكان هو دايماً بيبكى ولكن بصمت من غير ما حد يحس بيه.
قصة حياته:
أتولد ”جون ميريك“ بمدينة "ليستر" ببريطانيا سنة 1862م،
أتولد بتشوه ظهر كأنه بسيط فى البداية وده مع أن أبوه وأمه طبيعيين، عاش السنين الأولى مع أمّه و أخوه آرثر و أخته ماريون، ولما بقى عمره سنتين لاحظت أمه - ماري جين ميريك – تغيير بيحصل فى جسمه، فبدأت كتل تنموا تحت الجلد عند الرقبة والصدر وبشكل أكبر فى راسه من ورا .. وأبتدت تقلق على أبنها، لأن إلى بيحصل لأبنها ده حاجه غريبة، وما شافتهاش قبل كده. ومع مرور الوقت أبتدا شكله يبقى أغرب بالتدريج، فأبتدا الجزء اليمين من راسه ودراعه وأيده تتضخَّم بشكل كبير وبقى مش قادر يحرك دراعه، وأبتدت الكتل على راسه وضهره تكبر بشكل مخيف ومقـزز
ولما بقى عنده 15 سنة راسه كبرت جدا وبقى فيها من ورا كتلتين كبار جداً، وفكه بقى كبير وبقى كلامه مش واضح، وكان كل الناس إلى فى الحى بتاعهم بتضحك عليه وكل ما حد يشوفه يتريق عليه ولكن قلب أمّه الحنون ساعده على الصمود وعلّمه مواجه قسوة الحياة من صغره. ولما بقى عنده حوالى 11 سنة ماتت أمه، وهى الوحيدة إلى كانت سنده فى الحياة، سابته لأب سكيَّر مش بيهتم بيه وزاد الطين بلّة أن أبوه أتجوز واحده تانى بعد ما ماتت أمه، وكانت قاسيه جداً عليه وطردته من البيت وهو عنده 12 سنة، وده خلاه يدوَّر على شغل فى كل حته ولكن ما فيش حد رضى يشغله، وكل مكان بيروحه مش بيلاقى غير السخرية والاستهزاء والتريقة.
وبعد كده خدوه في دار للفقراء وهو عنده 17 سنة، لكنه هرب منه بعد كام سنة، لأنهم تعبوه جداً هناك. بعد كده مالقاش حته غير ”سيرك المسوخ“ و هو نوع من السيرك بيعرض الناس إلى عندهم تشوّهات خَلقية وشكلهم غريب، والناس بييجوا ويتفرجوا عليهم ويتسلوا. وأستغله صاحب السيرك السيّئ ”بيرتس“ فأخذه وحطه في قفص حقير في دور فى السيرك وأستغل شكله الغريب المُشوه وعرضه قدام الناس على أساس أنه شبيه بالفيل وسماه ”الرجل الفيل“. وجمع صاحب السيرك فلوس كتير جداً من الناس إلى عاوزين يشوفوا شكل الراجل المسكين ده
ولما كان مع صاحب السيرك الجشع شافه الدكتور ”تريفز“ وهو جرّاح ومحاضر لعلم التشريح بمستشفى فى لندن، فذُهل من حالته وعطف عليه وحب أنه يساعده، ولكن”جون“ رفض أنه يقبل كده لأنه أعتبرها صدقة وقال له : "أنا لستُ شحّاذاً" ورفض عرض الدكتور تريفز، وبعد كده بفترة قصيرة أصدرت الحكومة البريطانية قانون يمنع "سيرك المسوخ" لأن فيه استغلال وحشى لأصحاب العاهات والتشوهات، وكده أتقطع رزق "جون" الوحيد، واضطر أنه يروح لبلجيكا لأنه كان بيدور على شغل في السيرك هناك لكنّه مالاقاش غير السخرية والضحك والاستهزاء فرجع للندن وراح وهو مضطر للدكتور تريفز، ودخله مستشفى لندن وقدر أنه يوفر له أوضه صغيرة فى المستشفى بمساعدة ملكة بريطانيا العظمى بنفسها ليعيش بها باقى عمره.
أتغيّرت حياة ”جون ميريك“ بالتدريج بعد دخوله للمستشفى وبعد ما أتوفرت له أوضة مريحة، ورعاية يومية، وأكل وشرب. يعنى حاجات ماكانش يحلم بيها !! وبالتدريج بدأت الممرضات والدكاترة يتعودوا عليه ويحبوه، وبقيوا بيتعاملوا مع ”جون“ الإنسان. كان الدكتور تريفز يعتقد أنه قدام ولد معتوه لكنه أكتشف أنه قدام شخص شديد الذكاء وعنده مواهب كتير ما كانتش عند الناس الأصحاء، فكان قارئاً نهماً، وبيحب القراءة جداً فى كتاب مقدس قديم كان شايله فى هدومه. وكان يكتب الشعر والنثر ويناقش في الفن والثقافة وينقد مؤلفات شكسبير، وكان بيصنع بيوت وكنائس مصغّرة غاية في الدقة والإتقان باستعمال ألواح خشب صغيرة. وكان كلامه حلو وإنسان حساس وحنين جداً وبيحب الناس وبقيت كل الناس بتحبه لما قربت منه
قصته انتشرت بين الناس وسمعت بيها الأميرة "ألكسندرا" أميرة ويلز وأمرت أنه يتنقل للمستشفى الملكي، لأن هناك الرعاية أفضل. وفيه واحدة من نجمات المسرح فى الوقت ده أسمها السيدة ”كاندل“ قابلت ”جون ميريك“ وأتكلمت معاه عن المسرح، وشكسبير، والاتجاه الواقعي والرومانسي في الفن، فأتكلم معاها عن أفكاره وآراءه فى الفن. وبدأت تتوافد عليه الزيارات من العـائلات الإنجليزية الراقية .. ويقعدوا معاه ويتكلموا .. وكانت كلمات النعمة بتخرج من فمه وعمره ما اتذمر على الله بسبب إعاقته وكان دايماً حاطط قدام عنيه عمل المسيح عشانه على الصليب وباصص للمجد إلى مستنيه لما يخلع الجسم المشوه ده.
وبقى من الشرف أنك تقابل السيد ميريك.
ولأول مرة يحس ”جون ميريك“ أنه إنسان، وده لما اكتشف الدكتور "تريفز" المواهب والثقافة الراقية إلى عنده. وذاع صيته في المجتمع الراقي والجرائد فى لندن وبدأت أكبر الشخصيات المثقفة تزوره، وأبتدت تزوره كمان الأميرة ”اليكس“ وعرفت قد أيه هو في منتهى الرقة والثقافة وكانت فى كل مرة بتزوره بتبكى عليه. وكان طول حياته بيردد : ”أنا لست حيواناً، أنا إنسان“. ورغم أنّه ماكانش عايش حياته كإنسان، إلا أنه قرر أنه يموت كإنسان.
هو كان لازم ينام على جنبه، لأن النوم على الضهر كان بيمنعه من التنفس بصورة طبيعية بسبب حجم رأسه الكبير جداً. لكنه فى يوم قرر أنه ينام زى الناس العاديين و لو كلّفه ده حياته، وده إلى حصل، نام على ضهره فأتخنق ومات فى يوم 11 أبريل 1890 وساب وراه حب كل الناس إلى قابلوه، لأدبه الشديد وثقافته العالية، مات "جون" وهو عنده 27 سنة. وأحتفظ العلماء بهيكله العظمي في كلية الأطباء فى لندن، وأتمنع من العرض الأيام دى للزوار
قال عنه الدكتور ”تريفز“ :
”كان يتجنب الآخرين كالأبرص، وقد أحتجز فى قفص كحيوان متوحش. لم يكن يعرف من العالم سوى ما كان يسمح به ثقب فى باب عربة الاستعراض المحبوس داخلها. كان يُعامل بطريقة لا يُعامل بها كلب، ويفر مذعوراً من العيون المحملقة به، ويلجأ إلى ركن مظلم يحتمى به ويختبئ فيه.“ !..
وأكمل الدكتور ”تريفز“ قائلاً:
”ولكن بعد ما أقترب الناس بالحب والعطف من جون ميريك وتلامسوا مع شخصيته الفريده، أنقلب من مجرد شئ مُطارَد، وأصبح إنساناً.“
لو كانت عندك مشاكل :
مش ممكن أبداً هتكون زى مشكلة ”جون ميريك“ أوعى تيأس فى يوم من ظروفك، أو مشكلتك، أو حياتك.
خليك واثق دايماً أنك إنسان مُمَيَّز فيك حاجات بتميزك عن ناس كتير دوَّر جواك وأنت أكيد هتلاقيها. الله دايما بيجملنا بالمواهب وعاوزنا ندوَّر عليها ونستثمرها.
من هنا ورايح مش عاوزين نيأس ولانخاف، لازم نثق أن المشكلة لو أتحطت فى أيد ربنا هتبقى بركة عظيمة. أتخطى مشاكلك، وأمراضك، وظروفك، وكل العقبات بقوة المسيح.
لأنها هتكون هى السلم إلّى هنطلع عليه ونوصل السما.
ولو ربنا ماسمحش بمشاكل وتجارب فى حياتك وعايش كويس :
فلازم تحب وتحترم كل الناس.
فاحترام الدكتور ”تريفز“ ”لجون“ خلاه يرفع راسه المشوهه وكمان ده دفع الناس أنهم يعترفوا بيه كإنسان مش مجرد عرض فى سيرك للفرجة، لأنه إنسان مخلوق على صورة الله ومثاله.
احترم كل إنسان، وأعطى الحب للكل، من أقل واحد لأحسن واحد، بلا استثناء ولا تفريق، ”الرجل الفيل“ قدامنا فى كل لحظة، موجود فى صورة شحات، فى صورة طفل معاق، فى صور كتير جداً، هما مش محتاجين منك أكتر من عطف، وحب، وحنان، أو مجرد طبطبه, أو نظرة وكلمة حلوة.
وخليك واثق أن الله بيقَدَّر الحاجات دى جداً ومكتوب عنه:
”ومن سقى احد هؤلاء الصغار كأس ماء بارد فقط باسم تلميذ فالحق أقول لكم انه لا يضيع أجره.
“ (متى 10:42).

/ الرجل الفيل بجد قصه غريبه اوى 107446

» الفيل والحبل الصغير
» الرجل الذى ضمنى؟ من هو
» صور غريبه منوعه.
» ما هى الاختلاف بين الرجل و المرأة ؟
» اسرار جابيه صوت الرجل