زجل بعنوان صرخة أم تم ألقاؤه في أعياد النيروز عام 1994 بأيباراشية طهطا وجهينة

ولدي وآه يا ولدي			ولدي يا كل أمالي
ولدي دا الدم غالي			ولدي أنت بس فين
ولدي أنا احتضنتك			ولدي أنا اللي صنتك
ولدي من يوم ما ولدتك			والقلب عليك والعين
حياتك غالية يا بني			وبكايا عليك تعبني
ومش معقول تسيبني			وان سيبتني ها تروح لمين
تسيب أمك اللي ملهاش غيرك			تسيب الهك اللي بينادي لك
تسيب شمعك . تسيب قناديلك			وتوه وتسأل السكة منين
في ليلي يا بني ونهاري بأناديك			يا بني حليت الشعر عليك
يا بني دا الهك مستنيك			وكفاية بقى م البين
في غيابك الأسود لبسته			في غيابك الفرح ما شفته
والهك اللي أنت صلبته			مش مكفيك فيه مسمار واثنين
دا الهك فداك بدمه			دا علشانك اتصلب ولا همه
دا اللي خلقه بسببك ذله			واتحمل من الألم سنين
تبيع ليه يا بني بس الهك			تبيع ليه الحب اللي نادى لك
ياراحيل ابكي على اولادك			اللي في طريقهم تايهين
بعت الهك وأخذت العربون			بعت الدم . بعت الميرون
وعشت مع عالم مجنون			مافيش معاه غير الأنين
الهك بكام بعته؟!			الهك ما خلاص رفضته
الهك ما في مرة طاوعته			وحياتك كانت تضليل
فين أنت يابني يا ابن ساره			فين أنت يابني يا ابن الحره
ليه تتغرب . ليه تتعرى			ليه تضيع في غمضة عين
دي سنين بتضيع من عمري			دي أيام بتدور وبتجري
ابني اللي مكانه كان حجري			بقى تايه مع التايهين
كان ليك اله بتصلي له			ف الضيقة كن بتنادي له
دلوقتي مين راح تشكي له			بعد مابعته وسيبته حزين
الجسد اللي أكلته نسيته			والدم اللي شربته نسيته
والهك يا ريت حبيته			زى ماحبك من زمان بسنين
فين الكنيسة . فين الأنوار			فين تناولك باستمرار
يا ويلك من عذاب النار			ويا ويل كل اللي مش سامعين
يابني ليه بس تعذب فينا			يابني دا اللي فينا مكفينا
ما كفايه العالم حوالينا			واخواتك دايما صابرين
ياأولادي خليكوا في حضني			دا خوفي عليكم تعبني
دا الهكم هو اللي ساندني			وصبرني ع الغلب سنين
أنا أم بأبكي وصوتي مسموع			أنا أم وعلى ابني قلبي موجوع
دي العين ماعدتش فيها دموع			وليك دايما في اشتياق وحنين
اكليل الشوك شفته ولا همك			وحتى الصلب ماحرك دمك
ولا لحظة فكرت في أمك			وشوف يهوذا قبلك بسنين
أمك حزينه عليك يا ابني			ليه تهدم وأنا عايزه أبني
دا العالم كان يحسدني			على أولادي المخلصين
داأنت للعالم آيه			وحكايتك في الخلق حكايه
ولا صلب الهك مش كفايه			دافي بعدك اليوم بيومين
الهك اتصلب ونصرك			وشرب المر عشان خاطرك
علشان يفكك من آسرك			ويفك كل المأسورين
شوف الابن الضال واتعلم			مش ممكن ييأس ويتألم
في الحال قام ولربه سلم			الأمر كله وهو معين
يابني أنا مستنياك			يابني مشتاقه لرؤياك
لازم في يوم الأيام ألقاك			ونرفع راية المسيحيين
ياجماعة ايه اللي جرى لنا			ياجماعة ماتبصوا لحالنا
فين صلاتنا . فين أعمالنا			فين الرحمة . فين الدين
أمي يا كنيستي ياأرثوذكسية			أمي ياصابرة على كل أذيه
يا سفينة ماشية معدية			يابر أمان لكل حزين
عزانا في ابنك المفقود			عزانا في يوم يرجع ويعود
عزانا بتعاليمك نجود			ونحمي أولادنا من الضالين
بصلوات الأباء الأطهار			مارمرقس لآخر الأحبار
الأنبا شنودة أبينا البار			اللي بصلواته عايشين
وأسقفنا المحبوب وياه			اللي قدومه عيد نستناه
الهنا دايما يرعاه			ويوصلنا المينا سالمين
يا أبينا صلي عنا			يا أبينا ياريت تذكرنا
يا اخواتي بروح واحدة معايا			نصرخ ونقول استجب آمين

كلام جميل ومعبر جدا
ميرسي ليك ابراهيم

[ندعوك للتسجيل في المنتدى أو التعريف بنفسك لمعاينة هذه الصورة]

» زجل بعنوان أبين زين تم ألقاؤه في أعياد النيروز عام 1990 بأيباراشية طهطا وجهينة
» زجل بعنوان اللسان تم ألقاؤه في أعياد النيروز عام 1993 بأيباراشية طهطا وجهينة
» زجل بعنوان محبة المال تم ألقاؤه في أعياد النيروز عام 1991 بأيباراشية طهطا وجهينة
» صرخة من الابدية
» صرخة خاطى