ازاى نعرف نصلى ؟وايه معنى الفتور الروحى وازاى نعالجه؟؟؟؟؟؟

ساعات كتير بنكون عندنـا مشكلة من الاتنين
ـ انـي بكون مش عارف أصلي !!
ـ أو عندي فتــور روحــي !!
مـا هو الفرق بين الاثنين ...؟؟
مش عارف أصلي ــــ يعني مش قادر أوصل لحالة الوقوف امام ربنا و أمسك أجبية او صلاه ارتجالية بسيطة و تكون عبارة عن ابانا الذي بس و دي طبعا صلاة ضعيفة للكبار و مش حاطط موضوع الصلاة في فكري او حاطه و نفسي بس في حاجة مانعة او بصلي لكن في وقت الضيقات و الطلبات فقط المهم في النهاية مش مواظب علي الصلاة خلاص كل يوم

الفتور الروحي ـــــ هو ممارسة خالية من الحب و الحرارة الاولي و تدرج سلبي مثل تقليل الصلاة , الانجيل , القداسات , الذهاب الي الكنيسة علي فترات لذلك هو لا حار و لا بارد فاقد طعم الشئ يقول الكتاب في رؤيا يوحنا اللاهوتي ..
(( أنا عارف أعمالك انك لست باردا ولا حارا هكذا لانك فاتر و لست باردا و لا حارا انا مزمع ان اتقيأك من فمي )) رؤ 15:3
يعني كنت مع ربنا في الاول بشعر بطعمه و بعدها بمده شعرت بالروتين و فقدت الروح

تعــالوا نعـرف الاسباب ::
اولا نحب نستشهد من الانجيل بمثال قاله السيد المسيح و هو مثل الزارع ( لو 15,4:8 )
السيد المسيح هنا تكلم عن كلمة الرب في البذرة التي يلقيها الزارع و اعطلي اربعة امثلة و هو يرمز هذا الرقم للازمنة و نـأخذ تأمل جميل ::
1- الطريق :: و هو يرمز الي السطحية في العلاقة بين الانسان و كلمة الرب فلابد ان ندرك جيدا ان لدينا عمل لابد القيام به كمسيحي و ابتعد عن السطحية في حياتي و نحاول التعمق للمعرفة الاكثر و لا نسلم انفسنا الي الفــــــــــــــراغ و نلاحظ ان داود النبي وقع في الخطية حينما كان متفرغــا كان يتمشي فوجد امرأة عارية تستحم فأشتهاها .. داوم علي سماع كلمة الرب من خلال الاجتماعات و حينما تتغذي بها تصلي بروح و ايضا اثناء الاجتماعات يوجد صلاة تساعدك علي ادخال العشرة مع الرب في يومك

2 - المتحجرة :: المظهرية في ناس من ظاهرها موجودة مع ربنا و من داخلها مش قاردة تفهم ربنا و بعيده عنه و تضعف في الضيقات و الاضطهادات و تتذمر و تقول ربنا بعيد يعني العلاقة متذبذة لانهم مش قادرين يفهموا ذاتهم و الكبرياء واخدهم و منعهم من الاعتراف بمشكلتهم و اول طرق حل المشكلة انك تؤمن ان عندك مشكلة و ده شئ رائع .. افرح لما تعرف انك متكبر لانك هتحاول تصلح .. افرح لما تعرف انك بتكذب لانك هتحاول تصلح ده
و وقتها هتقف قدام ربنا تقوله غيرني و ده اللي هيخليك تبدأ صلاة

3 - الشوك :: المشغولية دائما مش عارف اصلي علشان الشغل و لقمة العيش منتوا عارفين بقي متطلبات الحياة نموت من الجوع يعني و ربنا اكيد عارف !! طيب و في الاربعين فين الشغل ولا لازم كل جمعة في الكنيسة يكون في أربعين علشان تحضر و الفرح بتاع قرايبك اللي فضيت نفسك مخصوص علشان تروحوه و انتي لما نزلتي للكوافير قبلها ب 5 ساعات تظبطي نفسك علشان تكوني جميلة و وقفتي و بذلتي مجهود لا يوصف من اجل هذا الفرح .. و فرح المسيح الابدي فين !! علي الاقل مش طالب انك تلبسي كويس و لا كوافير و لا تعب بالعكس ساعة او نص ساعة صلاة معاه هيفرح بيها
اللي بيحب يعمل حاجة بيفضي نفسه علشانها بلاش عدو الخير يحاربنا بوهمنا بالمشغولية خليك مصمم ان مفيش حاجة هتبعدنا عن ربنــا

4 - الارض الجيدة :: القلوب السمائية هي دي اللي عايزين نوصلها من خلال الصلاة
ــ قبل النوم اكيد مش مشغول صلي
ــ الكتاب المقدس علي الموبايل لو مشغول و صلي
ــ افهم كلمة ربنا خاللي عندك حب ليه و اطلب منه الطريق للوصول للعمق فيه
ــ ابعد نفسك عن الكبرياء و حاول تسعي للاتضاع و فهم نفسك و خدمه الاخرين

أسبـــاب الفتــور الروحــــي ::
ممكــن تكون أيضـا نفس الاسباب السابقة و معـها
1 - البعد عن حرارة التوبة
2 - الانشغال عن الله
3 - الاهتمـام بشكلية العباده دون الروح و العمق
4 - توقف النمو الروحي مما يؤدي الي التراجع
5 - وجود خطية او شهوة (( تعريف الزنا عن احد الاباء انه التعري من الروح القدس ))
6 - الكبريــــــاء منتهي الخطورة ( كان سبب وجود الشيطان )
7 - البعد عن الوسائط الوحية
8 - المتكأت الاولي و محبه المديح و الكرامه
9 - تدخل الاخرين في حياتك

طـــرق العلاج ... بالنسبه لاني مش عارف أصلي لربنا

1- التحدث مع الله :: لازم تتحدث مع ربنا بكل صراحه مش انت بتقول مش عارف تصلي خلاص أقف قدام ربنا و كلمه و قوله كده انا مش عارف اصلي انا مش عارف أوصلك علمني ازاي أوصلك مش حاسس بيك عرفني ازاي احس بيك و علمني ازاي احبك الحديث بصراحة مع الرب هام جدا اضع مشكلتي في يد الرب و اعلم من اين سقطت و الحديث ده صلاة و كما يقول اشعياء النبي هلما نتحاجج

2 - القــراءة :: لازم تقرأ كتير كتب دينية و روحية و اجعل الصلاة تعمق فيك من خلال الانجيل ايضا ورقة و قلم و ايات تعجبك او تأملاتك و تعرضها علي اب اعترافك و خليها تاخد روح الجدية و ليس السطحية و ايضا اسئلة كتير هتقابلك اسأل علشان تتعلم و هتلاقي نفسك بتصلي ربنا يفهمك اكتر و اكتر و من حبك في الكلام مشاعرك هتتحرك يعني القرأة ممكن تحرك مشاعرك نحو الصلاة او التقلد بشخصيه عجبتك في الانجيل مثل العشار المتضع او الزانية التي بكت للتوبة و هكذا

3 - الخدمــة :: لقتل الفراغ ابدأ في نشاط و سوف تشعر بالمسئولية و الصلاة من اجل خدمتك و المخدومين و الكنيسة و تقودك الي العمق في المسيح و الطلبات الكثيرة و تبدأ تفهم الرب من خلال الخدمة و تبعد الشيطان عنك في وقت الفراغ لانك ستصبح مشغولا

طــرق علاج الفتور الروحــي
....................................

1 - العمق يعالج الفتور :: لا تهتم بالكم بل بالكيف أهتم بعمق الصلاة و ليس بطول وقتها حتي لو لحظات صمت بينك و بين الرب و القلب يتكلم

2 - الصلاة المستمرة بتركيز :: يارب يسوع المسيح اعني انا الخاطي ارحمني و خلصني و هي سهلة و بسيطة و تعمق العلاقة بينك و بين الرب و كما قال احد الاباء تجعل المسيح ملتصق بقلبك

3 - محاسبة النفس و التوبة :: لازم تكسر ذاتك و تحس دائما بخطيتك علشان تشعر انك حار وقت الفتور يقول داود النبي حتي لا يشعر بالعظمة خطيتي امامي في كل حين
و ايضا يقول لك وحدك أخطأت من شدة الخطية و الاحساس بالندم

4 - التغصب و المثابرة :: جهاد روحي و نقول دايما هصلي في اي وقت مهما حدث هصلي و لن اترك المسيح حتي و ان كانت صلاتي بدون طعم انت يا الهي قادر ان تجعلني اتخطي هذة المرحلة

يـــا أبني أعطني قلبك
الفتور الروحي أعلم انه و قت و يزول اهم حاجة الصلاة من القلب
أي مشكلة قول لربنا عليها و اب اعترافك وواجه نفسك بيها و متهربش منها

حتي لو انت في الخطية و غرقان ... ايد ربنا تديك الامان

بقــلم :: ديفيد عــادل
المراجع :: وعظة لابونا اشعياء كاهن كنيسة مارمرقس
بعض الموضوعات من الانترنت
بعض الاقول للابــاء عن الفتور و الصلاة

الرب يعطينا نعمة و بركة من اجل قيام قلوبنا للصلاة